من اختار انا للرئاسة

وانا اتساءل لماذا هناك تأيد للسيد احمد شفيق رئيسا للجمهورية وجدت نفسى اتسأل من ارشح انا رئيسا للجمهورية من ارى انه يستحق هذا المنصب واتوسم فيه القدرة على جعل بلادى تصل للطريق الصحيح .. موقف مصر معقد كبلد عربية تلاصق دوله اسرائيل التى يكن لها كل العرب مشاعر بغيضة ودائما ما كنا نحن ملطشتهم عند اى عدوان اسرائيلى على غزة ودائما ما كان قتل ضباطنا وجنودنا اسهل شىء تقوم به حماس واسرائيل ايضا على الحدود عند  اى عدوان على اى منهم .. شعارات شعارات يحملها الجميع حتى انى توقفت عن سماع اى تصريحات لمرشح رئاسى وقلت لنفسى ما كان مبارك مقضيها شعارات ووكس مصر وذل عيالها فى الاخر فما اسهل الكلام انا نفسى اذا ترشحت يوما ما للرئاسة ساقول نفس الشعارات والكلام معلوش جمرك فى الاخر ودى المصريين بيجربوا واية الجديد ما طول عمرنا بنجرب .. مرشح عاوز يبقى بطل قومى زى مثله الاعلى ناصر ومش مهم دا هيبقى ازاى حتى لو على جثث المصريين وايه يعنى ما طول عمرهم بيموتوا من غير ميعرفوا هما بيمتوا ليه وعلشان ايه والاخر عاوز يحولها اسلامية اسلامية دا على اساس انها كافرة دلوقتى وبرضه على اساس ان النماذج اللى عندنا للدول اللى رافعة شعار اسلامية اسلامية دول ماشاء الله ماشاء الله ناجحة على اساس ان افغانستان وباكستان والسودان والصومال وايران نماذج لدول ناجحة والديمقراطية عندهم للركب وياعينى عاوزين يتبرعوا بالفائض اللى عندهم للدول المتخلفة زى تركيا والصين والاخر عاوز طول عمره يبقى فى الضوء مستثمر حب الناس له ايام زمان على اساس انهم مصدقين انه وقف امام سيده وهدد مصلحته مع اسرائيل فبعته على الجامعة على اساس انه مكنش يقدر يقصيه زى وزراء كتير دخلوا وخرجوا من الوزرات دون ان يعلم الشعب ليه دخلوا وليه خرجوا . وواحد واخد المساءلة عند هو ومؤيدية زى ماخرجوه من رئاسة الوزراء بالعافية هيجلهم رئيس والعند باه طبع اغلب المصريين وانا اولهم .وواحد مقدرش زمان يبقى نقيب للاطباء بسبب محاربة النظام السابق له طبعا زى محنا عارفين فتح على الرابع وقرر انه يبقى رئيس لمصر ومش مهم باع مين علشان يوصل .......... هل هؤلاء هم من نستحق بعد كل هذه المعاناه وهل هؤلاء هم من تستحقهم مصر فى هذا المرحلة الحرجه من تاريخها مش هما كانوا بيقولو مصر ولادة طب هما فين ولادها دول من منهم يعى جيد الشعار اللى كان رفعه ولادها وماتوا من اجله ( عيش - حرية - كرامه انسانية ) ويقدر يحققه على ارض الواقع امتى يمصر ربنا هيرزقنا برئيس يكون عليه اجماع شعبى يقدر يوحد المصريين ويحددوا معاه الطريق التى يجب ان تسير عليه مصر ويرجع ليهم فى اى قرار يريد ان يتحذه لتعود مصر قويه ورائده ويصبح كل مصرى فعلا فخور وهو بيقول انا مصرى مش بيقولها وقلبة بيعتصر الما